Cúig chomórtas ar fad a imreofar ag Comórtas Peile na Gaeltachta i nGaeltacht Ráth Chairn i mbliana – Comórtais Shóisear agus Shinsear na bhFear chomh maith le Comórtais Shóisear, Idirmheánach agus Shinsear na mBan. Beidh Comórtas Peile na Gaeltachta ar siúl le linn dheireadh seachtaine na Cincíse idir 30 Bealtaine agus 2 Meitheamh, 2025.
Comórtas bliantúil Gaeilge is ea Comórtas Peile na Gaeltachta ina mbíonn clubanna Gaeltachta as na seacht gcontae Ghaeltachta chomh maith le hÁth Cliath agus Aontroim páirteach ann gach bliain. Bíonn clubanna as Sasana agus as Meiriceá páirteach ann ó am go chéile chomh maith. Bíonn an comórtas náisiúnta seo de chuid Chumann Lúthchleas Gael ar siúl le linn dheireadh seachtaine na Cincíse ag tús mhí an Mheithimh gach bliain agus bíonn sé á óstáil ag club difriúil Gaeltachta ó bhliain go bliain. Is i nGaeilge a dhéantar gach gnó de chuid an chomórtais.